ၾကားသိသမွ်

NUG အား ငြိမ်းချမ်းရေး နိုဘဲလ်ဆု ချီးမြှင့်ရန် အမည်စာရင်း တင်သွင်းခံရ

NUG အား ငြိမ်းချမ်းရေး နိုဘဲလ်ဆု ချီးမြှင့်ရန် အမည်စာရင်း တင်သွင်းခံရ

နော်ဝေး အတိုက်အခံ ပါလီမန် အမတ်များမှ ဦးစီး၍ ၂၀၂၂ အတွက် အမျိုးသား ညီညွတ်ရေး အစိုးရအား ငြိမ်းချမ်းရေး နိုဘဲလ်ဆု ချီးမြှင့်ရန် ယနေ့ အမည်စာရင်း တင်သွင်းလိုက်ပြီ ဖြစ်သည်။

လစ်ဘရယ် ပါတီ အမတ် Ola Elvestuen မှ NUG သည်သာ မြန်မာပြည်၏ ဒီမိုကရေစီ နှင့် အညီ တရားဝင် အစိုးရ ဖြစ်၍ ယခုလို အမည်စာရင်း တင်သွင်းလိုက်ရခြင်း ဖြစ်သည်ဟု ထုတ်ဖေါ်ပြောဆိုခဲ့သည်။


ထိုသို့ ဆုချီးမြှင့်မှသာ ကမ္ဘာတဝှမ်း ရှိ ဒီမိုက‌ရေစီ အင်စတီကျူးရှင်း နှင့် မူဝါဒ များ ရှင်သန် ရွေ့လျား နိုင်မည် ဖြစ်သည်ဟု ဆိုသည်။
ငြိမ်းချမ်းရေး နိုဘဲလ်ဆု အတွက် ဇန်နဝါရီ ၃၁ ကို သတ်မှတ်ထားပြီး ရွေးချယ်ခံရသူ၏ အမည်အား အောက်တို ဘာလ အစောပိုင်းတွင် ကြေညာမည် ဖြစ်သည်။

အခြား အမည်စာရင်း တင်သွင်း ထားသူများမှာ မြန်မာ၏ CDM၊ ဆွီဒင်၏ ရာသီဥတု အရေး တက်ကြွလှုပ်ရှားသူ ဂရက်တာ သွန်းဘတ်ခ်၊ ဗြိတိသျှ သဘာဝ သိပ္ပံပညာရှင် ဒေးဗစ် အက်တင်ဘိုရို၊ ပုပ်ရဟန်းမင်းကြီး နှင့် ဘဲလာရုစ် အတိုက်အခံ ခေါင်းဆောင်တို့ ဖြစ်သည်။

မြန်မာ ပြည်သူများ၏ အကြမ်းမဖက် အာဏာဖီဆန်ရေး လှုပ်ရှားမှုကြီးက ကမ္ဘာတဝှမ်း တွင် စံနမူနာ ပြ ဖြစ် အောင် ထပ်မံ၍ ဆွဲကိုင် လှုပ်ရမ်းလိုက်ပြန်ပြီ ဖြစ်သည်။


ပြင်သစ် သတင်းဌာန ၂၄ မှ ရန်ကုန်မြို့တော်၏ လမ်းမ များပေါ်တွင် အင်္ဂါနေ့ မနက်က လူများ သည် လုပ်စရာ ရှိသည်များအတွက် အလုအယက် သွားလာလုပ်ကိုင်နေကြသည်။ သို့သော် နံနက် ဆယ်နာရီ ထိုးကာနီးတွင်တော့ လမ်းများပေါ်မှ လူများ ကြက်ပျောက် ငှက်ပျောက် ပျောက်ကုန်ကြတော့သည်ဟု ရေးသားထားသည်။

လန်ဒန်ထုတ် ဂါဒီယန်း သတင်းစာကြီးတွင်မူ မြစ်ကြီးနား၊ နမ္မတီး မှသည် တောင်ဖက်စွန်း ထားဝယ်၊ မြိတ် မြို့ များ အထိ လူသူ ကင်းမဲ့လျှက် ရှိနေသည်ဟု ဖေါ်ပြထားသည်။ (သတင်းစာတွင် ဖေါ်ပြထားသော ပုံကို တွေ့နိုင်သည်)


ဤသည်မှာ စစ်တပ်သည် ရွေးကောက်ပွဲ မသမာမှုများ ရှိသည်ဟု ဆိုကာ လူထု လက်မှ အာဏာကို သေနတ်ပြပြီး သိမ်းယူခဲ့သည့် တနှစ်မြောက်နေ့တွင် ၎င်းတို့၏ မတရား အနိုင်ကျင့်သည့် လုပ်ရပ်အပေါ် ဒေါသအမျက် ချောင်း ချောင်း ထွက်နေကြဆဲ ဆိုသည်ကို တတိယ အကြိမ်မြောက် တနိုင်ငံလုံး လမ်းပေါ် မထွက်ဘဲ ပြသခဲ့ကြခြင်း ကြောင့်ပင် ဖြစ်သည်။

ပြည်သူတို့၏ ထိုကဲ့သို့ ဆန္ဒထုတ်ဖေါ်ခဲ့ကြသည်ကို တကမ္ဘာလုံး က စောင့်ကြည့် နေခဲ့ ကြပြီး ဆိုရှယ် မီဒီယာများမှာ တွေ့ရသော ဓါတ်ပုံများအရ လမ်းများပေါ်တွင် မနက် ဆယ်နာရီ မှ ညနေ လေး နာရီအတွင်း လူသွားလူလာ မရှိသလောက် ဖြစ်နေသည်ဟု နိုင်ငံတကာ မီဒီယာများက တညီတညွတ်တည်း ရေးသားလာကြသည်။

တတိယ အကြိမ်သည် အထူး အရေးပါသော အောင်ပွဲတရပ်လည်း ဖြစ်သည်။ အသံတိတ် သပိတ်ကို ဖြိုခွဲရန် စစ်အာဏာသိမ်း အဖွဲ့မှ အကျပ်ကိုင် ခြိမ်းခြောက်သည့် ဥပဒေ မျိုးစုံ ထုတ်ပြန်ထားသည့်ကြားမှ ပြည်သူ တရပ်လုံး စည်းလုံးညီညွတ်စွာ တွန်းလှန် နိုင်ခဲ့သည့် သမိုင်းဝင်နေ့ကြီး တနေ့ အဖြစ် တွင်ကျန် ရစ်ခဲ့ပြီ ဖြစ်သည်။ ထိုကဲ့သို့ အမှန်တရားဖက်မှ ရပ်တည်ရန် ငြင်းဆန်ခဲ့သူများ အဖို့ သမိုင်း၏ ဒဏ်ခတ်ခြင်းကို မလွဲမသွေ ခံကြ ရပေဦးတော့မည်။

အမေရိကန် သမ္မတ ဂျိုးဘိုင်ဒင်သည် မြန်မာ စစ်ခေါင်းဆောင်များ အနေဖြင့် ၎င်းတို့လုပ်ရပ်များကို နောက် ပြန် ဆုတ်ရန်၊ လူထုခေါင်းဆောင် ဒေါ်အောင်ဆန်းစုကြည် အပါအဝင် ဖမ်းဆီးထားသူများအား ပြန်လွှတ်ပေးရန် နှင့် အဓိပ္ပါယ် ပြည့်ဝသည့် ဆွေးနွေးမှုများဖြင့် ဒီမိုကရေစီ လမ်းကြောင်းပေါ် ပြန်သွားကြရန် ကြေညာချက် ထုတ်ပြီး တောင်းဆိုလိုက်သည်။

ရန်ကုန်၊ ပဲခူး နှင့် မြစ်ကြီးနား မြို့ကြီးများတွင် နေရာအနှံ့ ဗုံးပေါက်ကွဲမှုများ ဖြစ်ပွားခဲ့ပြီး အနည်းဆုံး လူနှစ်ဦးခန့် သေဆုံးသွားကြောင်း တရုတ်သတင်းဌာန CGTN က ဖေါ်ပြလာခဲ့ပြန်သည်။


ဧရာဝတီ သတင်းအရ တာချီလိတ် မြို့ တပ်ထောက်ခံ ပွဲ ပြုလုပ်သည် ရှမ်းရိုးမကွင်းတွင် ဗုံးနှစ်လုံး ဆက်တိုက်ပေါက်ကွဲ ခဲ့သည့်အတွက် ထိခိုက် ဒဏ်ရာရ သေဆုံးမှုများ ရှိနေသည်ဟု သိရသည်။

ထိုနေ့မှာပင် ကမ္ဘာထိပ်တန်း စစ်တမ်း ကောက်ယူသည့် Gallup Poll မှ စက်တင်ဘာ ၂၂ မှ ဒီဇင်ဘာ ၂ ရက် အကြား ကောက်ယူခဲ့သော စစ်တမ်းကို ထုတ်ပြန်ခဲ့ရာ အစိုးရ အပေါ် ယုံကြည်မှုသည် ၂၈% သာ ရှိ တော့သည်ဟု သိရသည်။ အာဏာမသိမ်းမီ ၈၀% ရှိခဲ့ရာမှ ယခုလို ၆၀% အထိ ထိုးဆင်းသွားခဲ့ခြင်း ဖြစ်သည်ဟု ဆိုသည်။

ရွေးကောက်ပွဲနှင် ပတ်သက်၍ ယခင် Gallup စစ်တမ်းများအရ ၈၂% သည် ရွေးကောက်ပွဲ ရလဒ်ကို အပြည့်အဝ ယုံကြည်ကြောင်း ထုတ်ဖေါ် ပြောဆိုခဲ့ကြကြောင်းလည်း ဖေါ်ပြထားသည်။

မင်းအောင်လှိုင် အဖို့ ၎င်း လုံးဝ မျှော်လင့်မထားသည့် ပြည်တွင်း စစ်ကြီး နှင့် ရှေ့တိုး နောက်ဆုတ် မရတော့ သဖြင့် နဖူးတွေ့ ဒူးတွေ့ရင်ဆိုင်လာနေရပြီ ဖြစ်၍ ရွေးကောက်ပွဲ မသမာမှု ကြောင့်ဟု ထပ်တလဲလဲ ပြောဆိုနေ ရပြီ ဖြစ်သည်၊

ထိုအကြောင်းပြချက် ကို မည်သူကမျှ လက်ခံ ကြခြင်း မရှိ၊ တပြည်လုံး က ဆန့်ကျင်နေကြမှန်း ကောင်းစွာ သိပြီး ဖြစ်သော်လည်း သစ္စာခံ တပ်များအကြား စိတ်ဓါတ် ပျက်ပြားလာနိုင်သည့် အရေးကြောင့် နိုင်ငံတဝှမ်း ထောက်ခံကြလေဟန် လုပ်ဇာတ်အမျိုးမျိုးခင်းကာ လူများကို လမ်းပေါ် သို့ အတင်းစေလွှတ်ခြင်း၊ ဈေးဆိုင်များ ဖွင့်ခိုင်းခြင်း၊ လူထု ထောက်ခံပွဲများ ဖန်တီးခြင်း အစရှိသည့် နည်းမျိုးစုံ ဖြင့် အတင်း အဓမ္မ ကြိုးစားနေကြရသည်။

၎င်းတို့ သက်ဆိုး ရှည်ရန် အတွက် ထိုသို့ ဂျပိုးကို လိပ်ဖြစ်အောင် လူထုကို လိမ်ညာ လှည့်စား ဝါဒ ဖြန့်ချီသည့် နည်းလမ်းမျိုးကိုသာ အမြဲတစေ ရှာကြံ လုပ်ဆောင်ကြရပေတော့မည်။

တော်လှန်ရေးကြီး မုချအောင်ရမည်!!!

Hla Soewai